2025-26 അദ്ധ്യയന വർഷത്തേക്കുള്ള പോളിടെക്‌നിക് ഡിപ്ലോമ പ്രവേശനത്തിന്റെ അന്തിമ റാങ്ക് ലിസ്റ്റും ഒന്നാമത്തെ അലോട്ട്‌മെന്റ് ലിസ്റ്റും നാളെ (ജൂൺ 25) പ്രസിദ്ധീകരിക്കും. അപേക്ഷകർക്ക് ഔദ്യോഗിക വെബ്സൈറ്റായ www.polyadmission.org സന്ദർശിച്ച് തങ്ങളുടെ അലോട്ട്‌മെന്റ് സ്റ്റാറ്റസും റാങ്കും പരിശോധിക്കാവുന്നതാണ്.

അലോട്ട്‌മെന്റ് പരിശോധിക്കേണ്ട രീതി

അപേക്ഷകർക്ക് ആപ്ലിക്കേഷൻ നമ്പർ, രജിസ്‌ട്രേഷൻ നമ്പർ, മൊബൈൽ നമ്പർ എന്നിവയിലേതെങ്കിലും ഒന്നും ജനനത്തീയതിയും നൽകി ‘Check your allotment’, ‘Check your Rank’ ലിങ്കുകൾ വഴി നിലവിൽ ലഭിച്ച അലോട്ട്‌മെന്റും അന്തിമ റാങ്കും പരിശോധിക്കാം.

ഒന്നാം അലോട്ട്‌മെന്റ് ലഭിക്കുന്നവർ ശ്രദ്ധിക്കുക

•⁠ ⁠ഒന്നാമത്തെ ഓപ്ഷൻ ലഭിക്കുന്ന അപേക്ഷകർക്ക് അലോട്ട്‌മെന്റ് ലഭിച്ച കോളേജിൽ അപേക്ഷയിൽ രേഖപ്പെടുത്തിയിട്ടുള്ള അസ്സൽ സർട്ടിഫിക്കറ്റുകളുമായി ജൂൺ 30 ന് വൈകിട്ട് നാല് മണിക്ക് മുമ്പായി ഹാജരായി ഫീസ് അടച്ച് അഡ്മിഷൻ നേടാവുന്നതാണ്.
•⁠ ⁠ഇപ്രകാരം ചെയ്യാത്ത അപേക്ഷകരുടെ അലോട്ട്‌മെന്റ് റദ്ദാക്കുന്നതും തുടർന്നുള്ള അലോട്ട്‌മെന്റുകളിൽ നിന്ന് ഒഴിവാക്കുന്നതുമാണ്. എന്നാൽ, അലോട്ട്‌മെന്റിന് ശേഷമുള്ള കൗൺസലിംഗ്/സ്‌പോട്ട് അഡ്മിഷൻ എന്നിവയിൽ ഇവർക്ക് പങ്കെടുക്കാം.

നിലവിലെ അലോട്ട്‌മെന്റിൽ സംതൃപ്തരാണെങ്കിൽ

•⁠ ⁠നിലവിൽ ലഭിക്കുന്ന അലോട്ട്‌മെന്റിൽ തൃപ്തരായ അപേക്ഷകർക്ക് (ഒന്നാമത്തെ ഓപ്ഷൻ അല്ലെങ്കിൽ പോലും) അലോട്ട്‌മെന്റ് ലഭിച്ച കോളേജിൽ അസ്സൽ സർട്ടിഫിക്കറ്റുകളുമായി ഹാജരായി ഫീസ് അടച്ച് അഡ്മിഷൻ നേടാം.

ഉയർന്ന ഓപ്ഷനുകൾ പരിഗണിക്കുന്നവർ

•⁠ ⁠ഇപ്പോൾ ലഭിക്കുന്ന അലോട്ട്‌മെന്റ് നിലനിർത്തുകയും എന്നാൽ ഉയർന്ന ഓപ്ഷനുകളിലേക്ക് മാറാൻ ആഗ്രഹിക്കുന്നവരുമായ അപേക്ഷകർ ഏറ്റവും അടുത്തുള്ള ഏതെങ്കിലും ഗവൺമെന്റ്/എയ്ഡഡ്/IHRD/CAPE പോളിടെക്‌നിക്കുകളിൽ അസ്സൽ സർട്ടിഫിക്കറ്റുകളുമായി (സർട്ടിഫിക്കറ്റുകൾ തിരികെ നൽകുന്നതാണ്) ഹാജരായി വെരിഫിക്കേഷൻ നടത്തി രജിസ്റ്റർ ചെയ്യണം.
•⁠ ⁠ഇങ്ങനെയുള്ള അപേക്ഷകർ രണ്ടാമത്തെ അലോട്ട്‌മെന്റിൽ അഡ്മിഷൻ എടുക്കേണ്ടതാണ്. അല്ലാത്ത പക്ഷം അലോട്ട്‌മെന്റ് റദ്ദാകും.

താൽപര്യമില്ലാത്തവർ ശ്രദ്ധിക്കുക

•⁠ ⁠നിലവിൽ ലഭിക്കുന്ന അലോട്ട്‌മെന്റിൽ താൽപര്യമില്ലാത്തവരും ഉയർന്ന ഓപ്ഷൻ മാത്രം പരിഗണിക്കുന്നവരും നിലവിൽ ഒന്നും ചെയ്യേണ്ടതില്ല. ഇവർക്ക് നിലവിൽ ലഭിച്ച അലോട്ട്‌മെന്റ് നഷ്ടപ്പെടും.

ഓപ്ഷനുകൾ പുനഃക്രമീകരിക്കുന്നത് എങ്ങനെ?

•⁠ ⁠അലോട്ട്‌മെന്റ് ലഭിക്കുന്നവർക്ക് അവരുടെ നിലവിലെ ഓപ്ഷനുകൾ പുനഃക്രമീകരണം ചെയ്യുന്നതിനോ ഒഴിവാക്കുന്നതിനോ അഡ്മിഷൻ പോർട്ടലിലെ ‘PARTIAL CANCELLATION/ RE-ARRANGEMENT OF OPTIONS’ ലിങ്കിലൂടെ സാധിക്കും.
•⁠ ⁠അഡ്മിഷൻ എടുക്കാനോ രജിസ്റ്റർ ചെയ്യാനോ താൽപര്യമുള്ളവർ ജൂൺ 30 ന് വൈകിട്ട് നാല് മണിക്ക് മുമ്പ് നടപടികൾ പൂർത്തീകരിക്കണം.

Summary:

The final rank list and first allotment list for Polytechnic Diploma admission 2025-26 will be published tomorrow (June 25). Applicants can check their status on www.polyadmission.org. Those allotted their first option must take admission by June 30th, 4 PM, or their allotment will be cancelled. Applicants satisfied with their current allotment can take admission, even if it’s not their first choice. Those wishing to retain their current allotment but explore higher options must register at a nearby Polytechnic by June 30th, 4 PM. Options can be rearranged online.